«Нахшилар» – уйгур элинин салттуу музыкалык чыгармалары. Алардын негизин поэтикалык саптар түзүп, обон, ыргак жана маанилик тереңдик айкалышат. Көбүнчө бул ырлар 3-5 мүнөттүн ичинде аткарылат, бирок ошол убакыттын ичинде эле уйгур элинин күнүмдүк жашоосу менен руханий дүйнөсүндөгү эң негизги ойлор – сүйүү, достук, мекенге болгон сагыныч, табият, моралдык баалуулуктар жана коомдук сезимдер – чагылдырылат. Эл ичинде «эркек киши дарак тигип, үй куруп, бала өстүрүп гана тим болбой, сөзсүз ыр да чыгарышы керек» деген сөз бар.

«Нахшилардын» стили ырдын мазмунуна жана аткарылган жагдайына жараша лирикалык, же болсо ойноок жана бийге ылайык түргө өтүп турат. Алар тилди, поэтиканы жана элдин музыкалык табитин сактап турган жандуу мурас болуп саналат.

Анын бир түрү – «коча нахшиси», жаштардын ырлары. Бул ырлар жаштардын күнүмдүк жана көңүл ачуу маданиятынын бир бөлүгү катары чыккан. Алар көбүнчө кечелерде, достук чогулуштарда жана үй-бүлөлүк тойлордо аткарылган.

Кыргызстанда ушул салттын негизинде белгилүү музыкалык чыгармалар жаралып, алардын ичинде «Герип-Санам», «Аткан чай», «Кызыл гүл» сыяктуу ырлар бар. Бул чыгармалар уйгур элинин ичинде гана эмес, андан тышкары да кеңири таанымал болуп, элге жаккан чыгармаларга айланган.