«Щи» – бул көп түрдүү даамдардан турган топтом. Анын курамына ар кандай чүчпаралар, эт котлеттери, кесилген эт, кычкыл-татымалдуу эт сорпосуна бышкан күрүч кошулат. Көбүнчө «Щи» 9, 12, 18, 24 же 36 түрдүү даамдан турат жана салат менен бирге майрамдык учурларда гана берилет.
«Щи» деп атаганы кытай тилинде «кубаныч» деген сөзгө үндөш. Чындыгында мааниси «дастаркон, той» дегенге жакын. Ошол себептен бул топтомго ар кандай тамактар кириши мүмкүн. Бардыгы эт сорпосунун жана бууланган күрүчтүн коштоосунда тартылат. Айрым жергиликтүү дунгандар «щиге» кошумча лагман, манты, куурулган балык, тоок этин да кошо беришет. Башкача айтканда, дунган ашканасынын миң түркүнү катары кабылданат.
Ал эми ганьсуйлук дунгандарда «щи» курамына эттин алты түрдүү котлети жана эки түрдүү эт кесиндиси салат менен кошо кирет.
Аймак
Чүй облусунун Искра, Кеңбулун, Хун Чи, Дмитриевка айылдары, Токмок шаары, ошондой эле Александровка жана Милянфан айылдарында; Ысык-Көл облусунун Ырдык айылында; Каракол жана Бишкек шаарында жашаган дунгандарда кездешет.
Абалы
Жандуу, кеңири кездешет
Коомдоштук
- Чүй жана Ысык-Көл аймактарында жашаган дунган коомдоштуктары
- Салттуу билим ээлери
- Кесипкөй ашпозчулар жана салттуу даам сүйүүчүлөрү
Коргоо иштери
- Маданий мурас катары изилдөө, сактоо жана өнүктүрүү боюнча атайын демилгелер жана иш-чаралар чанда аткарылганы менен салттуу дунган ашканасы боюнчадаам-тамактарды даярдоо китептери чыккан.
- Күнүмдүк турмушта улуу муундан жаш муунга тарбия берүү ирээтинде жана тажрыйба бөлүшүү жолу менен сакталып келет.
Адабият/Шилтеме
- Юсурова З. Г. Дунгандардын тамак-ашынын рецепттери. – Бишкек, 2016.
- Юсуров Х. Ю., Юсурова З. Г. Дунгандардын ашканасы. – Фрунзе: Кыргызстан, 1988.