Жорону уюштуруу жана өткөзүү өзүнө тиешелүү шарты боюнча жана ырымдары менен коштолгон:

• Эшик ага – конокторду аттан түшүрүп тосуп алган, үйгө киргизип, дасторкон четине отургузган. Коноктордун кабак-кашын карап, көңүлүн алган.
• Аякчы – коноктордун аягына улам бозо жаңыртып куюп туруу үчүн атайы дайындалган жаш жигит. Ал кызматка элпек, жайдары, илбериңки жигиттерди дайындашкан.
• Эрке бала – шайыр, сүйлөсө куйкум сөзү бар, элге жагымдуу, жылдыздуу жүзү бар, комузду кармаса күүсү жарашкан, коштоп ырдаса үнү жарашкан өнөрлүү жигиттерден бирин мурдатан алдырышып эрке бала дайындашкан. Эрке бала каалаган кишисин сүйлөткөн, каалаган кишисин ырдаткан. Шартын аткарбагандарга ар кандай тапшырмаларды берип жаза иретинде аткарткан.
• Жаза аяк – кечигип келгендерге жана оюндардын шартын аткарбагандарга бозо толтура куюлуп шыпкап ичиши үчүн сунула турган өтө чоң аяк болгон.
• Тамаша – жоронун негизги бөлүгүн түзүп, бозого кызыган теңтуштардын өз ара бири-бирине айтылган куйкум сөзү. Аны бири баштаса, ага карата айтылган киши жооп берип, калгандары жиреп, сүрөп, колдоп, тамашаны андан ары өркүндөтүп отурушкан.
• Кер айтыш – оозунда сөзү төгүлгөн төкмөлөр, же болбосо, сөз өнөрү бар жоронун катышуучулары тамаша үчүн “кер айтыш” уюштурушкан. Кер айтыш – ачуу тамаша айтыш, кордоп айтыш.
• Алым-сабак айтыш – айтыштын жумшак түрү. Жеңил көңүл көтөрө турган маанайда айтышышкан.
• Табышмак айтыш – айтышты биринчи баштаганы оюн табышмактатып ырдаган, атаандашы жандырмагын чечмелеп жооп берген.
• Бозо уулагандар – жорого атайы катышпаса деле көңүл ачуу максатында айылдаштары, тааныштары келишкен. Аларга да аяк сунулуп, тамашага аралаша берген.