«Гөш нан» – уйгур элинин салттуу тамактарынын бири, эт салынган нан (пирог). Анын өзгөчөлүгү – бир эле учурда куурулуп, андан кийин бышырылып жасалгандыгы. Ошондуктан камырынын даамы өзгөчө, ичи жумшак, сырты болсо кытырак болуп чыгат.
Даярдоо жол-жобосу бир нече баскычтан турат. Адегенде камырды эки тегерек жалпак токоч кылып жайылат. Бирөөсүнө эт фарш салынат да, үстүнөн экинчи токоч жабылып, четтери бекем чымчылат. Анан казандагы кызыган майга салып, эки бетин кызарганча куурулуп алынат. Кызаргандан кийин казанга суу кошулуп, отту жайлатып 40 мүнөттөй демделет. Ушундайча жасалган «гөш нан» өзгөчө жыпар жыттуу жана абдан жумшак болот.
Бул даам уйгур элинин ашканасында абдан маанилүү. Аны күнүмдүк турмушта да, майрамдык дасторкондорго да жасашат.
Аймак
Кыргызстандын уйгур коомдоштугу жашаган бардык аймактарында. Айрыкча Бишкек шаарында жана анын айланасында, Чүй облусунун Ысык-Ата жана Аламүдүн райондорунда; Ош облусунун Кара-Суу районунда; Ысык-Көл облусунун Каракол шаарында, ошондой эле Баткен жана Жалал-Абад облустарынын айрым жерлеринде кездешет
Абалы
Жандуу, кеңири кездешет
Коомдоштук
- Кыргызстандын бардык аймактарында жашаган уйгур коомдоштугу
- Салттуу билим ээлери
- Жеке ашпозчулар жана салтуу уйгур ашкана сүйүүчүлөрү
- Уйнур коомдоштугунун маданий жана өнөрчүлөр бирикмелери
Коргоо иштери
- Күнүмдүк турмушта улуу муундан жаш муунга тарбия берүү ирээтинде жана тажрыйба бөлүшүү жолу менен сакталып келет.
- 1989-жылы негизделген «Иттипак» коомдук бирикмеси уйгур маданий мурасын сактоо боюнча жигердүү иш жүргүзүп келет. Маданий мурастар боюнча маалымат жана тиешелүү иш-чаралар ошол эле аталыштагы гезитте маал-маалы менен жарыкка чыгып турат.
Адабият/Шилтеме
- Ушуров Р. Уйгур ашканасы. – Алма-Ата, 1992.
- Ушуров Р. Уйгур элинин 1000 түркүн даамы. – Алматы: Мир, 2011.